Webcams
Buscar
Los centros de salú de Llangréu tratarán mancadures cutánees con nitróxenu líquido
This is a modal window.
L'área sanitaria del Nalón inxertará la técnica de crioterapia n'atención primaria
El Serviciu de Salú del Principáu (Sespa) entamó un plan de formación nel área sanitaria del Nalón, con cabecera en Llangréu, pa inxertar la técnica de crioterapia n’atención primaria, procedimientu indicáu pa tratar mancadures cutánees, que dexará reforzar la capacidá de resolución de los centros de salú, qu’ufiertarán un tratamientu eficaz y seguru, ensin necesidá de derivaciones hospitalaries.
Profesionales d’enfermería y medicina d’atención primaria del área VIII entamaron esta selmana les sesiones de formación sobre esta técnica, qu’ampliará la cartera de servicios disponibles na zona.
Piénsase que’l plan formativu remate esti mes, de mou que n’abril entame yá l’atención a pacientes, informa’l Gobiernu autonómicu.
La dermatóloga del Hospital del Valle del Nalón Ainhoa Marquet ye la encargada d’instruir al personal na aplicación clínica de la crioterapia mediante nitróxenu líquido.
Nel plan de formación, tamién s’aborden casos nos que nun se pue aplicar esti tratamientu, asina como aspectos de seguridá y manexu del nitróxenu líquido.
La crioterapia o terapia del fríu ye un tratamientu local qu’usa nitróxenu líquido p’abordar problemes dermatolóxicos, indicáu para tratar mancadures benignes como papilomes, molluscum, queratosis seborreiques, verruges y fibromes, ente otros.
Tamién ye efectiva frente a mancadures premalignes como queratosis actíniques (tumores epidérmicos).
L’área sanitaria del Nalón ye la primera n’inxertar esti plan de formación pa capacitar al personal d’atención primaria.
El Sespa tien la intención d’esparder tanto les sesiones d’enseñanza como l’ampliación de prestaciones a tola rede d’atención primaria, cumpliendo asina’l so compromisu de meyorar l’accesibilidá a los servicios sanitarios.
